اصول اساسی در تعیین مرزهای آزربایجان و کردستان

آذربایجان میللی حؤکومتینین آذربایجان سرحدلری حاققینداکی دوشونجه لری و اویقولامالاری تاریخی- ایستیراتئژیک- میللی باخیمدان یانلیش اینانج و سییاسی ضعف اوزوندن اورتایا چیخان شئیلردیر و بیزی و آذربایجان'ین گله جه یینی باغلاماز.

آچیق نئت'ده یاییلان آشاغیداکی یازی، هم زامانلاما باخیمیندان یئرینده و هم ایچه ریک آچیسیندان -بیر ایکی نؤکته دیشیندا- منطیقلی و دوغرو اساسلار اوزه رینده قورولموش اویقون بیر جاوابدیر.

نامه سرگشاده به احزاب و سازمان های کرد ایرانی

فورصتدن ایستیفاده ائده ره ک اوز آدیما اونو حاضیرلایانلاردان تشککور ائدیره م.

یوخاریدا دئدیییم بیر ایکی نٶکته ایسه بونلاردان عیبارتدیر:

یازینین ان تمل سورونو، کورد-تورک و آزربایجان-کوردوستان سینیرلاری و سرحدلرینین بلیرله نمه سینده تعقیب ائدیله جک یٶنته مله ایلگیلیدیر. یازیدا بو یٶنته مین آزربایجان میللی حٶکومتی و کوردوستان دٶولتینین آرالاریندا ایمضالادیقلاری آنلاشمانین روحونونا باغلی قالماق اولدوغو یازیلیر.

آ- اگر بو "روح"دان آماج، دانیشیقلار یاپماق و دییالوقسا، بو بوتونویله قبول ائدیله جک و هر ایکی طرفین چیخارینا اولان بیر یٶنته مدیر.

ب- اگر بو "روح"دان آماج، او ایکی دٶولت آراسیندا یاپیلان آنلاشمالارین اٶزو ایسه، بو هئچ بیر شکیلده قبول ائدیله جک بیر روح دئییلدیر و بوتونویله تورک خالقی و آزربایجان`ین میللی چیخارلارینا ترسدیر.

آزربایجان میللی حٶکومتی و کوردوستان دٶولتی آراسینداکی آنلاشمالار سورونلو آنلاشمالاردیر. او آنلاشمالاردا وار اولان اساس سورون، ائتنیک آزربایجان یئرینه، پهلوی دٶولتینین ایستئعماری سییاستلری دوغرولتوسوندا یارادیلان ایداری تقسیماتین اساس آلینماسیدیر. آزربایجان میللی حٶکومتینین، آزربایجانین تورپاق بوتونلویونه ترس اولان بو یانلیش ایداری تقسیماتی قبول ائتمه سی سونوجوندادیر کی سولدوز'ون کوردوستان دٶولتینه داخیل ائدیلمه سی کیمی تاریخی بیر خطایا تانیق اولوروق. بو باره ده آشاغیداکی یازییا باخابیله رسینیز:

سلدوز ترک را جزو جمهوری کردستان کردند
رادیو بی بی سی: ارومیه و سلدوز مزاحم آرمان کردستان هستند

آزربایجان دئموکرات فیرقه سینین صاحیب اولدوغو یانلیش آزربایجان تصووورو- کی آزربایجانین جوغرافییاسی، تاریخی و تاریخی جوغرافییاسینا، آزربایجانین ژئواسیتئراتئژیک چیخارلارینا یئته رینجه تانیش اولماماسی، پهلوی دیکتاسینین ایداری تقسیماتینی سورغولامادان و گٶزو باغلی قبول ائتمه سی و سووئت دٶولتینین زورلاماسی ایله اورتایا چیخمیشدیر- هئچ بیر شکیلده بوگون اوچون گئچه رلی اولابیلمه ز. بو اٶلومجول سییاسی خطا و یانلیشلیق - ان باشدا آزربایجان`ین سولدوز، تیکان تپه، سایین قالا، .... بٶلگه لرینده یاشایان تورک خالقی اوچون قبول ائدیلمه زدیر.

آزربایجان دئموکرات فیرقه سینین یانلیش آزربایجان تصوورو تکجه باتی آزربایجانا محدود قالماییبدیر. بو حٶکومت عئینی یانلیشلیغی، آذربایجان تورپاغی اولدوقلاری حالدا، ایداری تقسیماتدا کوردوستان و کیرمانشاهان اوستانلارینا باغلانان بیجار-گروس، یاسسو کند، قوروه، سونقور، .... باره سینده ده ائله ییبدیر. اٶته کی یاندان عئینی یانلیشلیق گینه ده فارس-مرکزی دٶولتله ده تئکرارلانیب و نتیجه ده آزربایجان`ین یاریسیندان چوخونو اولوشدوران تورپاقلاریمیز یعنی بوگونکو زنجان، همدان، قزوین، تئهران، قوم و مرکزی اوستانلاری، آزربایجان`ین دیشیندا قبول ائدیلیب و فارسیستان-مرکزی دٶولته بیراخیلیبدیر.

باشقا بیر دئییشله آزربایجان میللی حٶکومتینین آزربایجان سرحدلری حاققینداکی دوشونجه و اویقولامالاری، تامامی ایله یانلیش و تاریخی-ایستیراتئژیک-میللی باخیمدان یانلیش اینانج، بیلگیسیزلیک و سییاسی ضعف اوزوندن اورتایا چیخان شئیلردیر و میللی چیخارلاریمیزا ترس دوشدوکلریندن اٶتورو، بیزی و آزربایجانین گله جه یینی باغلاماز.

من بورادا قیسساجا فئدئرال آزربایجان و کوردوستان`ین میللی سینیرلاری و دٶولت سرحدلرینی بلیرله مه ده واز گئچیلمه ز اولان اساسلاری سیرالاییرام:

١- تمل و گنه ل ایلکه- اساس یاشایان خالقدیر:

ایران`ین شیمال غربینده کی بوتون تورک یئرله شیم منطقه لری آزربایجان'ا و ایران`ین شیمال غربینده کی بوتون کورد یئرله شیم بٶلگه لری کوردوستان'ا – آشاغیداکی قئیدلر گٶز اٶنونه آلیناراق- داخیل ائدیلمه لیدیر.

٢- اساس آلیناجاق زامان کسیدی- ١٩٠٦ اٶنجه سیدیر:

اساس آلیناجاق زامان کسیدی و تاریخ، ایندیکی ائتنو-دئموقرافیک دوروم دئییل، ١٩٠٦ ایلیندن قاباقکی ائتنیک وضعیییتدیر. ١٩٠٦ تاریخی، فارس شووئنیسمینین ایران دٶولتی و بوروکراسیسینه حاکیم اولدوغو تاریخدیر. بو تاریخدن سونرا میللی- ائتنیک بٶلگه لرینین ترکیبینده گرچکله شه ن بوتون ده ییشیکلر (تورکییه و ایرانین باشقا بٶلگه لریندن آزربایجان`ا گلیب بورایا یئرله شدیریله ن کوچه ری کورد طایفالاری، بٶیوک شهه رلر،... اورمو و بنزه رلرینه یاپیلان کورد کٶچ و آخینلاری سونوجوندا بورالاردا کوردلرین ساییسینین آرتماسی، کوردلرین له هینه اورتایا چیخان دئموقرافیک ده ییشیکلیکلرو....)، کولونییال ده ییشیکلیکلر اولوب، هئچ واخت میللی- ائتنیک بٶلگه لرین و فئدئرال دٶولتلرین سرحدلرینی تعیین ائدیلمه ده اساس آلینابیلمه ز. آزربایجان تورپاقلاریندا ١٩٠٦دان سونرا اولوشموش هر هانسی کورد یئرله شیم بٶلگه سی- شهه ر یا دا کند فرق ائلمه ز- بوگون یوزده یوز کورد اولسالار دا، گینه ده آزربایجان`ا داخیل ائدیلمه لیدیر.

نئجه کی عراق`دا بارزانی و طالیبانی، کورد بٶلگه سی و خوصوصن کرکوک'ون ایستاتوسونو بلیرله مک اوچون، بعث رئژیمین قورولماسیندان قاباقکی وضعیییتین اساس آلینماسی، حتتا بو تاریخدن سونرا بٶلگه یه کوچ ائده ن و یا یئرله شدیریله ن عربلرین بئله، بو تورپاقلاردان ائشییه آتیلماسینی مودافیعه ائدیرلر، بیز ده ١٩٠٦ ایلیندن سونراکی آزربایجان`ا تورکییه، عراق و یا ایران`ین باشقا بٶلگه لریندن یاپیلان کورد کٶچلرینین، آزربایجان`ین میللی سرحدلرینی بلیرله مه ده هئچ بیر تاثیری اولمایاجاغینی ساوونمالیییق.

٣- کوردوستاندان قاچان تورکلر سورونو:

گونوموزده کوردلرله مسکون اولان ساووج بولاق (ماهاباد)، خانا (پیرانشهر)، ساققیز و.... ده یاشایان تورکلر، ١٩٠٦ تاریخیندن سونرا بیر نئچه مرحله ده ، کوردلرین باسقی و سالدیریلارینا معروض قالیب و اٶز تاریخی یورد یووالارینی ترک ائتمیشلر. بو قاچیش خوصوصییله اینقیلابدان سونرا سورعتلی اولوب و بٶلگه ده کی اونلارجا تورک کندی بوشالدیلیبدیر. حالبوکی بو دٶنه مده آزربایجاندا یاشایان هئچ بیر کورد، بورادان کوردوستان`ا گئری قاییتماییبدیر.باشقا دئییشله سون یوز ایلده کوردلرین یاشادیغی بٶلگه لردن تورکلرین چیخیشی و تورکلرین یاشادیغی بٶلگه لره کوردلرین گیریشینه تانیق اولماقداییق.

آزربایجان و کوردوستان سرحدلرینی موباحیثه ائده نده کٶچ –قاچماغا مجبور ائدیله ن کوردوستان تورکلرینین (خانا، ساققیز، ساووجبولاق،....) گونده مه گتیریلمه لیدیر. بونلارین کوردوستان`ا قاییتمالاری، کوردوستان فئدئرال دٶولتی طرفیندن ماددی (تورپاق، مال-داوار) ضررلرینین قارشیلانماسی، قاییتمالاری مومکون دئییلسه ده اونلارین ساییسی قده ر کورد`ون (ویا کورد یئرله شیم مرکزلرینین) آزربایجان تورپاقلارینا داخیل ائدیلمه سی شرط قوشولمالیدیر.

٤- کوردوستان و کیرمانشاهان اوستانلارینداکی آزربایجان تورپاقلاری:

پهلویلر دٶنه میندن باشلایاراق، ائتنیک آزربایجان`ین بیجار، قوروه و سونقور بٶلگه لری کوردوستان و کیرمانشاهان اوستانلارینا داخیل ائدیلیب، بورایا بیر طرفدن بٶیوک کورد کٶچو و گیریشی گرچکله شیب، بیر طرفدن ده بورانین یئرلی تورک اهالیسی، زنجان و همدان اوستانلارینا موهاجیرت ائدیب و ائدیرلر.

آزربایجان و کوردوستان سرحدلرینی موباحیثه ائده نده همیشه بیجار، قوروه و سونقورداکی تورک بٶلگه لرینین-یعنی ١٩٠٦دان قاباق تورکلرله مسکون اولان بٶلگه لر، بوگون کوردلرله مسکون اولسالار بئله- موطلقن آزربایجان`ا داخیل ائدیلمه سی وورقولانمالیدیر. هارانین تورک بٶلگه سی اولدوغونو تثبیت ائده نده ده بوگونکو وضعیییت دئییل، ١٩٠٦'دان قاباقکی جمعیییتین ائتنیک ترکیبی نظرده آلینمالیدیر.

غربی آزربایجانداکی بیر سیرا کورد یئرله شیم مرکزلرینین فئدئرال کوردوستان`ا باغلانابیلمه سی، حتتا بو مووضونون موباحیثه ائدیلمه سی، آنجاق و یالنیز ١٩٠٦دان قاباق تورکلرله مسکون اولان بیجار، قوروه و سونقور کیمی بٶلگه لرین، داها اٶنجه دن فئدئرال آزربایجان`ا باغلانماسینا مشروطدور.

یوخاریداکی تاریخی دئموقرافیک اوصوللاردان باشقا، آزربایجان-کوردوستان فئدئرال دٶولتلرین سرحدلرینی تعیین ائتمکده سییاسی ایستیراتئژیک اساسلار دا رول اویناییر.

٥- سییاسی-امنییتی ایلکه لر- تورکییه یه بیتیشیکلیک گره یی:

آزربایجان -تورکییه آراسیندا جوغرافی بیر سد ویا فاصیله یاراتماق آزربایجان و تورک خالقینین ایستیراتئژیک چیخارلاری و خوصوصییله گله جکده کی کورد و مرکزی فارس-فارسیستان دٶولتلری، و حتتا ائرمنیستان قارشیسیندا امنیییتینین ساغلانماسی اوچون حیاتی اٶنمه صاحیبدیر. باشقا بیر دئییشله، اگر تورکییه- ایران سینیر بویوندا ١٩٠٦دان قاباق دا بیر سیرا کورد بٶلگه لری مووجود اولموش اولسا- کی بئله بیر شئیین اولدوغوندان آرخایین دئییله م- کوردلرله مسکون بئله نچی یئرله شیم بٶلگه لری، گینه ده هئچ بیر شرطینه ن، کوردوستان دٶولتینه داخیل ائدیله بیلمه ز.

ایراندا ائتنیک ویا فئدئرال کوردوستان`ین تورکییه ایله اورتاق سرحددی یوخدور و اولمایاجاقدیر. ایرانین شیمال غربینده، تورکییه نین بوتون سینیر بویو تک قونشوسو آزربایجان اولمالیدیر.

٦- اوشنو (خانا)، آزربایجان`ین عراق`ا آچیلان قاپیسی:

اسکیدن تورکلرله مسکون اولان اوشنو شهریستانی، آزربایجان`ی عراق`ا - و بو وسیله ایله اورادا یاشایان و کورد یاییلماچیلیغی و ظولمونه معروض قالان تورکمان دییاسپورامیزا- و عرب دونیاسینا باغلایان تک گئچیددیر. بو ندنله اوشنو (خانا) ایندیکی ائتنیک ترکیبی نه اولورسا اولسون، موطلقن فئدئرال آزربایجان سرحدلری ایچینده قالاجاقدیر.

باشقا بیر دئییشله، ائتنیک ویا فئدئرال آزربایجان و عراق`ین، شرطلر نه اولورسا اولسون، اورتاق سرحددی اولمالیدیر.

٧- اورمو-سولدوز مئحورینین حیاتی اٶنه می:

پهلوی دٶرونده، اورمو گٶلونون گونئیینده کیچیک بیر بٶلگه ماهاباد شهریستانینا باغیشلانیب و بئلجه اورمو ایله سولدوز آراسیندا قوپوقلوق اولوشدورولوبدور. بو یوللا بیر طرفدن کوردلره اورمو گٶلونه چیخیش یولو ساغلانیب بیر طرفدن ده سولدوز- تیکان تپه- سایین قالا حتتا بیجار و... گله جکده کورد ایشغالی قاباغیندا ساوونماسیز بیراخیلیبدیر.

اورمو-سولدوز مئحوری گونئی آزربایجان`ین غربی سرحدلرینی قوروماقدا حیاتی اٶنمه صاحیبدیر. بو مئحورده هر هانسی قوپوقلوق، قوزئیده اورمو- سالماس- خوی- چالدیران- ماکی'نین و گونئیده سولدوز- تیکان تپه- سایین قالا- بیجار- یاسو کند- قوروه- سونقور'ون دوشمه سی و راحاتلیقلا کوردوستانا ایلحاق ائدیلمه سی دئمکدیر. بو ندنله، اورمو گٶلونون گونئیینده ماهاباد شهریستانینا داخیل ائدیلمیش ١٩٠٦'دان قاباقکی تورک بٶلگه لری- ایندیکی ائتنیک ترکیبلری نه اولورسا اولسون – فئدئرال آزربایجان`ا عاییددیر.

باشقا بیر دئییشله هئچ بیر شرط آتیندا اورمو- محممدیار- سولدوز آراسیندا قوپوقلوغا ایذین وئریلمه مه لیدیر، ائتنیک ویا فئدئرال کوردوستان`ین اورمو گٶلونه چیخیشی یوخدور و اولمایاجاقدیر.

٨- تبریز و اردبیل آکتیویستلری و کورد مساله سی:

آزربایجان`ین کوردوستانلا اولان اورتاق غربی سرحدلری و عومومیییتله کورد-تورک مساله سی حاققیندا فیکیر سٶیله یه نلر گنه للیکله شرقی آزربایجان و اردبیل اوستانلارینداندیرلار. البتته بو اٶزلویونده پیس بیر شئی دئییلدیر، حتتا چوخ گره کلی و سئویندیریجی بیر دورومدور. آمما تجروبه گٶسته رمیشدیر کی بو یوردداشلاریمیز تورک-کورد و آزربایجان-کوردوستان مساله سینه دریندن و هر طرفلی بلد دئییلدیرلر.

بو اوزدن بو مساله لر حاققیندا موطلق شکیلده یئرلی اهالیدن اولان آیدین و آکتیویستلریمیز - و اٶنجه لیکله غربی آزربایجان (اورمو، سولدوز، تیکان تپه، ماکی، سالماس، سایین قالا، ...)، کوردوستان (بیجار، قوروه، یاسسو کند، سونقور...) و همدان (باهار، اسداباد، ....) سٶز صاحیبی اولمالی و اٶن پیلانا چیخمالیدیرلار.